புத்தகத் தேர்வு எனும் கலை

புத்தகத் தேர்வு ஒருவருக்கு உடனே நடந்துவிடுகிறது என்றால் அவர் அவ்வளவாக நல்ல வாசகர் இல்லை என்றும் சொல்லலாம். முன்பு பரவலான வாசிப்புப் பழக்கமும், புத்தகம் வாங்கும் பழக்கமும் இல்லாத சமயங்களில் ஒரு புத்தகத்தின் தேவை நமக்கு நன்கு தெரிந்துவிட்டிருக்கும். நேராகச் சென்று அதை மட்டும் வாங்கிக் கொண்டு வந்துவிடலாம். செவிவழிச் செய்திகளே நமக்குப் போதுமானதாக இருக்கும். அத்தோடு புத்தகங்களின் எண்ணிக்கைக் குறைவும் புத்தகத் தேர்வை எளிதாக்கிவிடும். 

வாசிப்பை நேசிக்கும் சமூகம்

எல்லோர் வீட்டிலும் தொலைக்காட்சி இருக்கிறது. தொலைக்காட்சியில் வரும் தொடர்களைப் பற்றி குடும்ப உறுப்பினர்களுக்கிடையே பேசிக் கொள்கிறார்கள். எது சிறந்த தொடர், அதில் வரும் கதாபாத்திரங்கள் எப்படி இயங்குகிறார்கள், அவர்களின் பாத்திர வடிவமைப்பைப் பற்றி, அவர்களின் குணநலன்களைப் பற்றி, தொலைக்காட்சி பார்க்கும் நேரத்தை தவிர்த்து, நாளில் ஒரு சில நிமிடங்களேனும் பேசிக் கொள்கிறார்கள்.

குடும்ப உறுப்பினர்களிடையே நல்ல ஆரோக்கிய உரையாடலை உருவாக்குகிறது என்றுகூட சொல்லலாம். ஆனால் இதேவகையான உரையாடல்களை ஒரு புத்தகம் குறித்து அல்லது ஒரு முக்கிய புத்தகத்தின் மதிப்பு குறித்தும் நாம் விவாதிக்கிறோமா என்றால் இல்லை என்றுதான் சொல்லவேண்டும். எந்த அளவிற்கு நாம் தொலைக்காட்சியை குறித்து பேசுகிறோமோ அந்த அளவிற்குகூட வேண்டியதில்லை, புத்தகம் குறித்து ஒரு சின்ன பேச்சுகூட நாம் பேசுவதில்லை. இந்த பேச்சுகள் முன்பு வாரப்பத்திரிக்கைகளில் தொடர்கதைகள் வெளிவந்த காலங்களில் இருந்தன. இப்போது அந்த இடம் தொலைக்காட்சிக்கு சென்றுவிட்டது.

சென்னை புத்தகக் கண்காட்சி 2017

ஒரு சம்பிரதாய நிகழ்வாக சென்னை புத்தகக் கண்காட்சி மாறிவிட்டது. புத்தக வெளியீடு, புத்தக கலந்துரையாடல், புகைப்படம் எடுத்தல் என்று நிகழ்வுகள், மனிதர்கள் மாறினாலும், மாறுவதில்லை. மூன்று ஆண்டுகளுக்கு முன்பு புத்தக வெளியீடுகளில் பெரிய சுணக்கம் இருந்தது. புனைவுகள் வாசிப்பவர்களின் எண்ணிக்கை குறைவு என்று வெளியிட மறுத்த பதிப்பகங்கள் அதிகம். சில ஆண்டுகளாக பதிப்பகங்களின் எண்ணிக்கை அதிகரித்து இன்று புத்தகங்களை வெளியிட பதிப்பகங்கள் போட்டிபோடும் நிலை வந்திருக்கிறது. புனைவுகளில் கவிதையை போலவே சிறுகதைகள், நாவல்கள் வெளியாகும் எண்ணிக்கை அதிகரித்திருக்கிறது. மற்ற ஆண்டுகளைவிட 2016-17ல் வெளியான சிறுகதை, நாவல்கள் கணக்கில் அடங்காமல் இருக்கின்றன. 

வாசிப்பு எப்படி இருக்க வேண்டும்.

என் நண்பர் ஒருவர் புத்தகம் பற்றி பேச்சு வந்தவுடன் எங்கங்க படிக்க நேரமிருக்குது, அந்தவேல இந்தவேலன்னு எல்லாம் சரியாக இருக்குது என்பார். படிக்கிறதுக்கு நாமதான் நேரத்த உருவாக்னும் என்றால், நீங்க சொல்றது சரிதான் ஆனா நேரமே அமைய மாட்டேங்குதே என்று மீண்டும் அதேயே கூறுவார். பலபேருக்கு படிக்க ஆசை இருக்கிறது மனைவியின் தொல்லை, மக்களின் தொல்லை என்று பல அவர்களுக்கு இடையூராக அமைக்கின்றன. வாசிப்பை சில நாட்கள் மட்டும் தீவிரமாக செய்துவிட்டு மற்ற நாட்க‌ளில் சும்மா இருப்பார்கள். பொதுவாக நிலைத்தன்மை (consistency) இருப்பதில்லை. ஒரு புத்தகத்தை ஆரம்பித்துவிட்டு பாதியில் விட்டுவிட்டு பல நாட்கள் கழித்து மீண்டும் வேறு ஒரு புத்தகத்தை படிக்க ஆரம்பிப்பது, மீண்டும் சில நாட்களில் வேறு ஒன்றை புதியதாக ஆரம்பிப்பது நடந்து கொண்டே இருக்கும்.

வாசிப்பு ஒரு தொடர் செயல் அதை ஒரு ரிலே ரேசாகத்தான் நினைக்கவேண்டும். ஒன்றை படித்தப்பின் அதன் தொடர்ப்புடைய மற்றொன்றை படிக்க வேண்டியிருக்கும். பின் அதன் தொடர்ச்சி. இப்படி தொடர் சங்கிலியாக செல்லவேண்டியிருக்கும். அப்படி வாசிக்கும்போது தான் வாசிப்பு ஒரு முழுமையை பெறும். மனதிற்குள் தொடர் விவாதத்தில் இருப்பவர்களால் தொடர்ந்து வாசிப்பை விடாமல் நிகழ்த்தமுடியும் என நினைக்கிறேன். அப்படி இல்லாதவர்களும் வெகுஜன வாசிப்பை தொடரமுடியும். அத்தோடு ஒரு வாசிப்பு அடுத்த கட்ட வாசிப்பை தொடங்கிவைக்க வேண்டும். அதாவது அதைவிட தீவிரமான, அதிக நேரத்தை கோருகின்ற ஒரு புத்தகத்தை வாசிக்க வைக்க வேண்டும். அதுவே சிறந்த வாசிப்பு.

வாசிப்பு

 வாசிப்பு தினம் பத்துபக்கமாவது இருக்க வேண்டும் என்பார்கள். நூறு பக்கங்கள்கூட தினம் படிப்பவர்கள் உண்டு. ஆனால் எல்லாமே வாசிப்பு ஆகிவிடாது என்று தோன்றுகிறது. ஆழமான வாசிப்பைதான் வாசிப்பு என்று கொள்ளவேண்டும். நான் தினம் தினத்தந்தி படிக்கிறேன், வாரப்பத்திரிக்கைகளைப் படிக்கிறேன், இணையத்தில் பலபக்கங்களை படிக்கிறேன் என்பதெல்லாம் வாசிப்பு என்ற கணக்கில் எடுத்துக் கொள்ளமுடியாது.

தினப்படி செய்கையாக, ஊன்றி நம் வரம்பிற்கு அல்லது நம் வரம்பை தொடும் அளவிளாவது படிக்க வேண்டும் என நினைக்கிறேன். ஒரு நாவல் அல்லது ஒரு அபுனைவாக இருக்கும் ஒரு முழுமையான நூல் ஒன்றை தினம ஒரு பத்து பக்கமாவது வாசித்து அதன் தொடர்ச்சியை அடுத்த நாளும் வாசிப்பதாக இருக்கவேண்டும். சிலர் ஒரு புத்தகத்தை ஒரே அமர்வில் முடித்துவிட்டு பின் பல நாட்கள் வாசிக்காமல் இருப்பதை கவனித்திருக்கிறேன். அதுவும் ஒருவகை வாசிப்பு என்றாலும் அதில் தொடர்ச்சி இல்லாத வகையில் சிறந்த வாசிப்பாக சொல்லமுடியவில்லை. தினமும் கம்பராமாயணத்தை வாசிக்க்கும் ஒரு நண்பரை எனக்கு தெரியும். அதில் சில கவிதைகளை வாசித்துவிட்டு அதன் தொடர்ச்சியை அடுத்த நாள் வாசிப்பார். அந்த தினத்தின் மற்ற நேரங்களில் கம்பராமாயணம் குறித்து எழுதப்பட்டிருக்கும்/விவாதித்திருக்கும் நூல்களை வாசிப்பார்.

ஆனால் வாசிப்பு பொதுவாக எளிதாக அமைவதில்லை. சிறுவயது முதல் வாசிப்பு கொஞ்சமேனும் இருந்தால் அல்லது அதில் ஒரு போதை இருந்தால் மட்டுமே நடுவயதில் வாசிப்பின் அடுத்தடுத்த கட்டத்தை எடுத்துச் செல்லமுடிகிறது. தமிழகத்தில் வாசிப்பு பழக்கம் உடையவர்கள் மிகக்குறைவு. அவர்கள் தொடர்ந்து எதாவது வாசிப்பது என்பது பல இடையூறுகளுக்கு இடையே தான் நிகழ்த்த வேண்டியிருக்கும். இதனால் உனக்கு என்ன பயன்? காசை ஏன் புத்தகம் வாங்கி வீணாக்குகிறாய்? இதை படிப்பதற்கு பாடபுத்தகத்தை படிக்கலாமே? என்று பல்வேறு தாக்குதல்களை ஒருவர் அனுபவிக்க வேண்டியிருக்கும். எல்லா மனங்களிலும் வாசிப்பு என்பது வெட்டிவேலை அல்லது ஒரு கெட்ட காரியம் என்கிற எண்ணம் வளர்ந்தே வருகிறது. இன்றைய தேதியில், புத்தகக் கண்காட்சி, புத்தக விற்பனை எளிதாகி இருக்கும் நிலையிலும் இந்த எண்ணம் தான் உண்டு.

படிக்க நினைத்திருக்கும் நாவல்கள், நூல்கள்

படிக்க நினைத்திருக்கும் நாவல்கள், நூல்கள் என்று படிக்காமல் விடுபட்டுப்போன‌ முக்கியமான நூல்களின் ஒரு லிஸ்ட் எப்போதும் என் வசம் இருக்கும். சிலிகான் ஷெல்ப்‍பின் ஒரு இடுகையை பார்த்தும். என் லிஸ்டை எழுதிப் பார்க்கலாமென்று தோன்றியது. இந்த புத்தக கண்காட்சியில் சென்னை வந்து வாங்கிவிடலாமென்றும் இருக்கிறேன்.

நாவல்கள்

1.        தலைமுறைகள் - நீல. பத்மநாபன்

2.       பள்ளி கொண்டபுரம். - நீல. பத்மநாபன்

3.       பதினெட்டாவது அட்சக் கோடு - அசோகமித்திரன்.

4.       வானம் வசப்படும் - பிரபஞ்சன்.

5.       மானுடம் வெல்லும் - பிரபஞ்சன்.

6.      ஹெலிகாப்டர்கள் கீழே இறங்கிவிட்டன - இந்திரா பார்த்தசாரதி.

7.       ஒரு மனிதன் ஒரு வீடு ஒர் உலகம் - ஜெயகாந்தன்.

8.       சில நேரங்களில் சில மனிதர்கள் - ஜெயகாந்தன்.

9.       புயலிலே ஒரு தோணி - ப.சிங்காரம்.

10 .    கடலுக்கு அப்பால் - ப.சிங்காரம்

11.     சிதறல்கள் - பாவண்ணன்.

12.     கள்ளம் - தஞ்சை பிரகாஷ்.

13.     பின்தொடரும் நிழலின் குரல் - ஜெயமோகன்

14.    என் பெயர் ராமசேஷன் - ஆதவன்

15.    ஆரோக்கிய நி்கேதனம் - தாராசங்கர் பானர்ஜி

பிற‌

1.  தமிழக நாட்டுப்புறப் பாடல்கள் - நா.வானமாமலை

2. குட்டி இளவசரன் - அந்துவாந்த் சந்த் எக்ஸ்பரி – பிராஞ்சு
3. வியாசமகாபாரதம் - வர்தமானன் பதிப்பகம்

-o0o-

மாடும் மனிதனும்: வாடிவாசல் - சி சு செல்லப்பா

எழுத்து ப‌த்திரிக்கை ஆர‌ம்பித்த‌போது அப்போது ச‌ந்தா செலுத்திய‌வ‌ர்க‌ளுக்கு அன்ப‌ளிப்பாக அனுப்பிவைக்கப்ப‌‌ட்ட‌ நாவ‌ல் இது. இத‌ன் விலை 1969ல் ஒரு ருபாய் தான். ஒரு நீண்ட‌ சிறுக‌தையைவிட‌ ச‌ற்று பெரிய‌து. ஒரேமூச்சில் ப‌டித்துமுடித்துவிட‌லாம். வேக‌மும் விறுவிறுப்பும் கொண்ட‌ இந்நாவ‌ல், எர்னெ‌ஷ்ட் ஹெ‌மிங்வே எழுதிய‌ க‌ட‌லும் கிழ‌வ‌னும் என்ற நாவ‌லை ஒத்த‌து. அந்நாவ‌லின் தாக்க‌த்தினால்தான் எழுத‌ப்பட்டும் உள்ள‌து. வாடிவாச‌லில் மாடுபிடிக்க‌வ‌ரும் ஒருவ‌ன் த‌ன் அப்பாவை கொன்ற அதே மாட்டை கொன்று ப‌ழிதீர்ப்ப‌துதான் க‌தை.

மாடு அணைக்க‌வ‌ரும் பிச்சி அவன் மச்சான் மருதன் அவர்களோடு கலந்துகொள்ளும் கிழவன் மற்றும் ஜமின்தார் இவர்களே முக்கிய கதாபாத்திரங்கள். மாடு அணையவருவதை சொல்லும் வருணனைகளும், காட்சி சித்தரிப்புகள் மிகவும் நுட்பமும் தத்ருபமானவை. ஜல்லிகட்டை தொடர்ந்து கவனித்து வரும் ஒருவரால் மட்டுமே இம்மாதிரி எழுதமுடியும். ஜல்லிகட்டின் மீதான நம் சந்தேகங்களை தீர்த்துவைத்துவிடுகிறது இந்நாவல். சி சு செ, அந்த கிழவனாக நின்று தன் அனுபவத்தை கதைமுழுவதும் கொட்டித்தீர்க்கிறார். பிச்சியின் மாட்டின் ஒவ்வொரு அசைவுகளையும் மிக அழகாக கூறுவதில் அவரின் எழுத்தனுபவம் தெரிகிறது.

ஐந்தறிவு மாடும் ஆறறிவு மனிதனும் போடும் போட்டி. இது மனிதனுக்கு மட்டும் விளையாட்டு, மாட்டிற்கல்ல என்கிறார் சி சு செல்லப்பா.

- o0o -

புத்தகக் கண்காட்சி

புத்தக கண்காட்சிக்கு புனேயில் உள்ளதால் நான் செல்லவில்லை. ஆனால் அதைப் பற்றிய செய்திகள் மீள மீள கிடைத்தபடியே உள்ளன. எழுத்தாளர்களும், வலைபதிவர்களும் தொடர்ந்து வலையில் எழுதியபடி உள்ளார்கள். விதவித சந்தோசங்கள், மகிழ்ச்சிகள், பூரிப்புகள் என்று அவர்களின் அனுபவங்கள், கடந்து செல்லும் நீண்ட புகைவண்டி காண்பதுபோன்ற ஆயாசமும், குதுகூலமும் ஒருங்கே ஏற்படுகின்றன.

இது ஒரு காலாசார நிகழ்வென்றும், ஒரு சமூக மாற்றமென்றும், தமிழர்களின் ஒரு முக்கிய திருவிழாவாகவும் ஆகிவிட்டதென்றும் எல்லா எழுத்தாளர்களும் சத்தியம் செய்துக் கூறிக்கொண்டிருக்கிறார்கள். டிவியின் வருகை, தமிழர்களின் வாங்கும் திறன் அதிகரித்தது, போன்ற இன்னும் பல காரணங்கள் கூறப்படுகின்றன. இதே மாதிரியான கருத்துகள் போன ஆண்டும் தெரிவிக்கப்பட்டது.

எதுவானாலும் ஒரு நல்ல நிகழ்வை ஒவ்வொரு ஆண்டும் இனிதே வரவேற்ப்போம், அது நம் கடமையும் கூட.

- o0o -

வாசவேச்வரம் - கிருத்திகா: விம‌ர்ச‌ன‌ம்

கிருத்திகா எழுதிய இந்நாவல் 1966ல் முதல் பதிப்பாக அவருடைய 50வது வயதில் வெளிவந்துள்ளது. நாப்பத்திமூன்றாண்டுகளுக்கு பின் இப்போது படிக்கும்போதும் புதிய நாவலொண்றை படிக்கும் மனநிலையே ஏற்படுகிறது. அழகான சொற்கள், வரிகள், காட்சி சித்தரிப்புகள் என அனைத்திலும் புதுமையை கொண்டுள்ளது இந்நாவல். இப்போது புகழிலிலிருக்கும் பல எழுத்தாளர்களின் எழுத்து சாயல்கள் அவர் எழுத்துகளில் உள்ளன. அவரே இவர்களின் ஆதர்ஷயமாக‌ இருப்பார்.

ஆண்கள் பெண்கள்மேல் கொள்ளும் மயக்கத்தை சித்தரிப்பதிலும், பெண்கள் ஆண்கள்மேல் கொள்ளும் மயக்கத்தை சித்தரிப்பதிலும், ஒரு பெண் எழுத்தாளர் இந்த அளவிற்க்கு எழுதமுடியுமா? அதுவும் 66ல். மிகப் பெரிய ஆச்சரியம்தான். எழுதி எழுதி தீராத வார்த்தைகள் அவை. நாவலுக்கே உரிய பண்புகளுடன் பரவிச் செல்கிறது. ஒரு காட்சியிலிருந்து மற்றோரு காட்சிக்கு எத்தனை அழகாக தாவிச் செல்கிறார் ஆசிரியர்.

கதாகாலச்சேபத்தில் ஆரம்பித்து கதாகாலச்சேபத்தில் முடிகிறது நாவல். முதலில் கதாகாலச்சேபம் முடிந்தபின் மக்கள் கொள்ளும் காமத்தை மிக அற்புதமாக சொல்கிறார். அதைவிட பெண்கள் ஆண்கள் அவர்களை 'கவனிக்காமல்' செல்லும்போது கொள்ளும் நுண்ணிய மனநிலையை மிக சாதரணமாக சொல்லிவிடுகிறார். இம்மாதிரி நாவல் முழுக்க வியப்புகளை அள்ளி தெளித்தபடியே செல்கிறது. ஒரு இடத்தில் கூட தொய்வெண்பதெயில்லை.

நிச்ச‌ய‌மாக‌ எல்லோரும் ப‌டிக்க‌வேண்டிய‌ புத்த‌க‌ம்.

- o0o -